ആധാർ സൗജന്യമായി പുതുക്കാം; ജൂൺ 14 വരെ
10 വർഷം മുമ്പ് അനുവദിച്ച ആധാർ കാർഡുകൾ ഓൺലൈൻവഴി സൗജന്യമായി പുതുക്കാൻ ജൂൺ 14 വരെ അവസരം. ഇതുവരെ അപ്ഡേഷൻ ഒന്നും ചെയ്തിട്ടില്ലാത്ത കാർഡുകൾ പുതുക്കാൻ തിരിച്ചറിയൽ രേഖകൾ, മേൽവിലാസ രേഖകൾ എന്നിവ http://myaadhaar.uidai.gov.in എന്ന വെബ് സൈറ്റിൽ സൗജന്യമായി അപ് ലോഡ് ചെയ്യാം. എന്നാൽ മൊബൈൽ നമ്പർ ആധാറുമായി ബന്ധിപ്പിച്ചവർക്കു മാത്രമേ ഓൺലൈൻ സംവിധാനം ഉപയോഗിക്കാനാവു. അക്ഷയ-ആധാർ കേന്ദ്രങ്ങൾവഴി ഈ സേവനം ലഭ്യമാകുന്നതിന് 50 രൂപ ഫീസ് നൽകണം. സേവനങ്ങൾ വേഗത്തിൽ ലഭ്യമാക്കാൻ മൊബൈൽ നമ്പർ, ഇ-മെയിൽ വിലാസം എന്നിവ നിർബന്ധമായും നൽകണമെന്ന് സംസ്ഥാന ഐ.ടി. മിഷൻ അറിയിച്ചു. രജിസ്ട്രേഷൻ സമയത്ത് മൊബൈൽ നമ്പർ, ഇ-മെയിൽ വിലാസം എന്നിവ നൽകാതിരുന്നവർക്കും പിന്നീട് മാറിയവർക്കും ഈ അവസരം പ്രയോജനപ്പെടുത്താം. നിലവിൽ നവജാത ശിശുക്കൾക്കുൾപ്പെടെ ആധാറിന് എൻറോൾ ചെയ്യാം. അഞ്ചുവയസ്സിന് താഴെയുള്ള കുട്ടികളുടെ എൻറോൾമെന്റിന് ബയോമെട്രിക്സ് വിവരങ്ങൾ ശേഖരിക്കേണ്ടതില്ല. എന്നാൽ കുട്ടിയുടെ ജനന സർട്ടിഫിക്കറ്റും മാതാപിതാക്കളിലൊരാളുടെ ആധാറും ഹാജരാക്കണം. കുട്ടികളുടെ ആധാർ ബയോമെട്രിക്സ് എന്നിവ അഞ്ച്, 15 വയസ്സുകളിൽ നിർബന്ധമായും പുതുക്കണം. അഞ്ചു വയസ്സുകാർക്ക് ഏഴു വയസ്സുവരെയും 15 കാർക്ക് 17 വയസ്സുവരെയും പുതുക്കൽ സൗജന്യമാണ്. ഇതു കഴിഞ്ഞുള്ള എൻറോൾമെൻ്റിന് 100 രൂപ ഫീസ് നൽകേണ്ടി വരും.
