ചങ്ങരംകുളത്തെ പൊടിശല്യത്തിന് പരിഹാരം കാണണം: വ്യാപാരികൾ
ചങ്ങരംകുളം : പൈപ്പിടാൻ റോഡ് പൊളിച്ച ഭാഗങ്ങൾ ടാർ ചെയ്യാത്തത് യാത്രക്കാരെയും വ്യാപാരികളെയും ദുരിതത്തിലാക്കുന്നു. ടൗണിൽ പകൽ രൂക്ഷമായ പൊടി ശല്യമാണെന്നും പല കച്ചവടസ്ഥാപനങ്ങളും ആളുകളെവെച്ച് വൃത്തിയാക്കേണ്ട അവസ്ഥയാണെന്നും വ്യാപാരികൾ പറഞ്ഞു. ഭക്ഷണശാലകൾ അടക്കം സ്ഥിതിചെയ്യുന്ന ടൗണിൽ രൂക്ഷമായ പൊടിശല്യം ഭക്ഷ്യ സുരക്ഷയ്ക്കുതന്നെ ഭീഷണിയാണെന്നും പരാതികൾ ഉയരുന്നുണ്ട്.
മണ്ണിട്ട് മൂടിയ കുഴികൾ മെറ്റൽ ഇട്ട് അടച്ചെങ്കിലും മെറ്റൽ മുഴുവൻ റോഡിൽ പരന്ന് കിടക്കുകയാണ്. ഇത് പലപ്പോഴും അപകടങ്ങൾക്കും കാരണമാകുന്നുണ്ട്. കഴിഞ്ഞ ദിവസങ്ങളിൽ ബൈക്കുകൾ റോഡിൽ മറിഞ്ഞ് വീണതായി കച്ചവടക്കാർ പറഞ്ഞു. അടിയന്തരമായി പൊടിശല്യത്തിന് പരിഹാരം കാണണമെന്നും പൊളിച്ച റോഡുകൾ പൂർവ സ്ഥിതിയിലാക്കണമെന്നും വ്യാപാരികൾ ആവശ്യപ്പെട്ടു.
