റോഡിലെ കുഴി: മിനിലോറി മതിലിൽ ഇടിച്ചുകയറി
മങ്കട : റോഡിലെ കുഴിയിൽവീണ് നിയന്ത്രണംവിട്ട മിനിലോറി സമീപത്തെ മതിലിലും കിണറിലും ഇടിച്ച് അപകടം. മതിൽ തകർന്നിട്ടുണ്ട്. തിരൂർക്കാട് മഞ്ചേരി സംസ്ഥാനപാതയിൽ കടന്നമണ്ണ മൃഗാശുപത്രിക്ക് സമീപം ബുധനാഴ്ച ഉച്ചയോടെയാണ് അപകടം.
പാലക്കാട് ചിറ്റൂരിൽനിന്ന് ഇളനീരുമായി മഞ്ചേരിയിൽ വന്നു മടങ്ങുന്ന ലോറിയാണ് അപകടത്തിൽപ്പെട്ടത്. വഴിയാത്രക്കാരും മറ്റു വാഹനങ്ങളും ഇല്ലാത്തതിനാൽ വലിയ ദുരന്തം ഒഴിവായി. അപകട സാധ്യതകൾ ഇല്ലാതാക്കാൻ റോഡിന്റെ അറ്റകുറ്റപ്പണി വേഗത്തിൽ ആക്കണമെന്ന ആവശ്യം ഇതുവരെ നടപ്പായിട്ടില്ലെന്നാണ് നാട്ടുകാരുടെ പരാതി. ഇതിനിടെ നടത്തിയ കുഴിയടയ്ക്കൽ പ്രഹസനവുമായി. തിരൂർക്കാട് മുതൽ കടന്നമണ്ണ വരെ റോ‍‍ഡിൽ ഇപ്പോഴും ധാരാളം കുഴികളുണ്ട്.
