പ്രണയം പ്രതീക്ഷകളുടെ വലകള്‍ നെയ്യലാണ്.. പ്രണയത്തിന്റെ അവസാനം നെയ്ത് വച്ച കിനാക്കളെല്ലാം ചാരമാവുന്നു
നിങ്ങൾ അയാളിൽനിന്നും പറയാതെ ഇറങ്ങിപ്പോകരുത്…! പ്രണയങ്ങളിലെപ്പോഴും ഒരു മനുഷ്യൻ പ്രതീക്ഷയുടെ വലകൾ നെയ്യുകയായിരിക്കും. ഏറെ കഴിഞ്ഞാൽ രണ്ടറ്റവും ഒന്നിച്ചുമുട്ടുമെന്നയാൾ ചിന്തിച്ചിരിക്കാം. കിനാവുകളുടെ അങ്ങേയറ്റത്തു നിന്നും കണ്ണെടുക്കാതെ നോക്കുന്നുണ്ടാകാം. ആകാശങ്ങൾക്കിടയിലൂടെ ഓരോ മേഘത്തോടൊപ്പവും നിങ്ങളെ തിരഞ്ഞിറങ്ങുന്നുണ്ടാകാം. ഇലകൾ തമ്മിലുമ്മവെക്കുമ്പോൾ ഏറെ നാണത്തോടെ അയാൾ തലതാഴ്ത്തിയിരിക്കാം. ചുംബനം കിട്ടാത്തതിന്റെ ദാഹത്തിൽ അയാളങ്ങനെ ഉറങ്ങിപ്പോകാം. എല്ലാ രാത്രികളിലും മനുഷ്യരിങ്ങനെ പ്രണയിക്കപ്പെടുമ്പോൾ നെയ്ത്തു കഴിഞ്ഞ് അയാൾ വഴിവക്കത്തു നിങ്ങളെ കാത്തു നിൽപ്പുണ്ടാകാം. പ്രിയപ്പെട്ട മനുഷ്യരേ, പറയാതെ ഇറങ്ങിപ്പോകുന്ന പ്രണയങ്ങളിലെല്ലാം ഒരാൾ മരിക്കുന്നതിന്റെ എല്ലാ അടയാളങ്ങളും അവശേഷിക്കാം. അതിനാൽ, നിങ്ങൾ അയാളിൽനിന്നും ഇറങ്ങിപ്പോരുന്നതിനു മുമ്പ് നെയ്തു വെച്ച കിനാവുകളെല്ലാം ഒരു പിടി ചാരമാക്കുക…! ✍🏻 ലുബ്‌ന ഷെറിന്‍ കെ.പി. വളാഞ്ചേരി
