കൊപ്പം പുലാശ്ശേരി വളവിൽ മോഷ്ടിച്ച ബൈക്ക് അപകടത്തിൽപ്പെട്ടു

കൊപ്പം–വളാഞ്ചേരി റോഡിൽ പുലാശ്ശേരി വളവിൽ മോഷ്ടിച്ച ഇരുചക്ര വാഹനവും പിക്കപ്പ് വാനും കൂട്ടിയിടിച്ച് അപകടം. വ്യാഴാഴ്ച വൈകീട്ട് നാലുമണിയോടെയാണ് അപകടം നടന്നത്. ഇരുചക്ര വാഹനത്തിൽ സഞ്ചരിച്ചിരുന്ന രണ്ട് യുവാക്കൾക്ക് കാലിന് പരിക്കേറ്റെങ്കിലും അപകടത്തിന് പിന്നാലെ ഇവർ ഓടി രക്ഷപ്പെട്ടു. പരിക്കേറ്റ യുവാക്കൾ വെള്ളം കുടിക്കാനെന്ന വ്യാജേന സമീപത്തെ വീട്ടിലേക്ക് പോകുകയും വീടിന്റെ പുറകുവശത്തുകൂടി ഓടി രക്ഷപ്പെടുകയുമായിരുന്നു. യുവാക്കളെ കാണാതായതിനെ തുടർന്ന് നാട്ടുകാർ നടത്തിയ തിരച്ചിലിലാണ് ഇവർ രക്ഷപ്പെട്ടതായി മനസ്സിലായത്. തുടർന്ന് കൊപ്പം പോലീസിൽ വിവരം അറിയിക്കുകയായിരുന്നു. സ്ഥലത്തെത്തിയ പോലീസ് ഇരുചക്ര വാഹനം പരിശോധിച്ചപ്പോഴാണ് വാഹനം മോഷ്ടിച്ചതാണെന്ന് കണ്ടെത്തിയത്. തൃശൂർ ജില്ലയിലെ കൊരട്ടി പോലീസ് സ്റ്റേഷനിൽ വാഹനം കാണാനില്ലെന്ന പരാതിയിൽ കേസ് നിലവിലുണ്ട്. കസ്റ്റഡിയിലെടുത്ത ഇരുചക്ര വാഹനം കൊരട്ടി പോലീസിന് കൈമാറുമെന്ന് കൊപ്പം പോലീസ് അറിയിച്ചു.