സിറ്റിസൺ റെസ്പോൺസ് പ്രോഗ്രാമിന് പാലക്കാട് ജില്ലയിൽ തുടക്കമായി

നവകേരളം സിറ്റിസൺ റെസ്പോൺസ് പ്രോഗ്രാമിന്റെ ഭാഗമായി നടത്തുന്ന വികസന ക്ഷേമ പഠന പരിപാടിയുടെ പാലക്കാട് ജില്ലാതല ഉദ്ഘാടനം തദ്ദേശ സ്വയംഭരണ - എക്സൈസ് വകുപ്പ് മന്ത്രി എം.ബി രാജേഷ് നിർവഹിച്ചു. നാഗലശ്ശേരി ഗ്രാമപഞ്ചായത്ത് രണ്ടാം വാർഡിലെ ഡോ. വി സേതുമാധവന്റെ വസതിയിൽ സന്ദർശനം നടത്തിയാണ് ജില്ലാതല ഉദ്ഘാടനം മന്ത്രി നിർവഹിച്ചത്. സർക്കാരിൻ്റെ പുരോഗതിക്ക് വേണ്ടി രാജ്യത്ത് ആദ്യമായാണ് പൊതു ജനങ്ങളുടെ അഭിപ്രായം അറിയുന്നതിനായി പരിപാടി സംഘടിപ്പിക്കുന്നതെന്ന് മന്ത്രി അറിയിച്ചു.⁣ ⁣ വിദ്യാഭ്യാസ മേഖലയിൽ കേരളം കൈവരിച്ച നേട്ടങ്ങൾ അഭിമാനകരമാണെന്ന് ഡോ. വി സേതുമാധവൻ അഭിപ്രായപ്പെട്ടു. വിദ്യാർത്ഥികളുടെ പഠനമികവിനും തൊഴിലധിഷ്ഠിത വിദ്യാഭ്യാസത്തിനും സർക്കാർ ഒരുക്കിയ സൗകര്യങ്ങൾ പൊതുജനങ്ങൾ കൂടുതൽ അറിയണം. ആരോഗ്യ- ശുചിത്വ മേഖലയിലും സർക്കാർ മികവാർന്ന പ്രവർത്തനങ്ങളാണ് നടപ്പാക്കിയത്. പത്ത് വർഷം കൊണ്ട് സംസ്ഥാനത്ത് സമഗ്ര പുരോഗതി കൈവരിക്കാനായി.⁣ ⁣ സംസ്ഥാന സർക്കാരും തദ്ദേശഭരണ സ്ഥാപനങ്ങളും നടത്തുന്ന വികസന ക്ഷേമപരിപാടികളെക്കുറിച്ചുള്ള അഭിപ്രായങ്ങളും നിർദ്ദേശങ്ങളും പൊതുജനങ്ങളിൽ നിന്ന് സ്വീകരിക്കുന്നതിൻ്റെ ഭാഗമായാണ് സന്ദർശനം. പഞ്ചായത്ത് തലത്തിൽ നിന്നും പരിശീലനം ലഭിച്ച കർമ്മ സേനാംഗങ്ങളായ വിജയകുമാർ , ഷിജിൽ എന്നിവരാണ് അഭിപ്രായ ശേഖരണം നടത്തിയത്.⁣ ⁣ തൃത്താല ബ്ലോക്ക് പഞ്ചായത്ത് പ്രസിഡൻ്റ് പി ആർ കുഞ്ഞുണ്ണി, ജില്ലാ ഇൻഫർമേഷൻ ഓഫീസർ പ്രിയ കെ. ഉണ്ണികൃഷ്ണൻ, തൃത്താല മണ്ഡലം ചാർജ്ജ് ഓഫീസർ ഡോ. കൃഷ്ണദാസ്, റിസോഴ്സ് പേഴ്സൺമാരായ പി രാധാകൃഷ്ണൻ, ഒ രാജൻ, വി ഗംഗാധരൻ തുടങ്ങിയവർ പരിപാടിയുടെ ഭാഗമായി.