'ഹെല്ത്തി കേരള' ഫീല്ഡ് കാമ്പയിന് ആരോഗ്യ ബോധവല്ക്കരണ നാടക പര്യടനത്തിന് ജില്ലയില് തുടക്കം
സംസ്ഥാന ആരോഗ്യ കുടുംബക്ഷേമ വകുപ്പിന്റെ ആഭിമുഖ്യത്തില് നടപ്പിലാക്കുന്ന 'ഹെല്ത്തി കേരള' ഫീല്ഡ് കാമ്പയിന്റെ ഭാഗമായുള്ള ആരോഗ്യ ബോധവല്ക്കരണ നാടക പര്യടനത്തിന് പാലക്കാട് ജില്ലയില് തുടക്കമായി. വടക്കഞ്ചേരി സാമൂഹികാരോഗ്യ കേന്ദ്രത്തില് നടന്ന പരിപാടിയില് പി.പി സുമോദ് എം.എല്.എ പര്യടനത്തിന്റെ ജില്ലാതല ഉദ്ഘാടനം നിര്വ്വഹിച്ചു. 'എല്ലാവര്ക്കും ആരോഗ്യം' എന്ന ലക്ഷ്യം മുന്നിര്ത്തി ആരോഗ്യവകുപ്പ് നടപ്പാക്കുന്ന വിവിധ പദ്ധതികളെയും സേവനങ്ങളെയും കുറിച്ച് ജനങ്ങളില് അവബോധം സൃഷ്ടിക്കുകയാണ് ഈ കാമ്പയിനിലൂടെ ലക്ഷ്യമിടുന്നത്. ആലത്തൂര് ബ്ലോക്ക് പഞ്ചായത്ത് പ്രസിഡന്റ് ടി. കണ്ണന് ചടങ്ങില് അധ്യക്ഷത വഹിച്ചു.
ആലത്തൂര് ബ്ലോക്ക് പഞ്ചായത്ത് ആരോഗ്യ സ്റ്റാന്ഡിങ് കമ്മിറ്റി ചെയര്മാന് അലി, വടക്കഞ്ചേരി ഗ്രാമ പഞ്ചായത്ത് ആരോഗ്യ സ്റ്റാന്ഡിങ് കമ്മിറ്റി ചെയര്പേഴ്സണ് അംബികവല്ലി ടീച്ചര്, മെമ്പര്മാരായ വിജയകുമാരി, ലൈല കാസിം, ഡെപ്യുട്ടി ജില്ലാ മെഡിക്കല് ഓഫീസര് ഡോ. അഹമ്മദ് അഫ്സല് , സാമൂഹ്യാരോഗ്യ കേന്ദ്രം സൂപ്രണ്ട് ഡോ. ജയന്ത് വി.ആര് , ജില്ലാ എഡ്യുക്കേഷന് മീഡിയ ഓഫീസര് സയന എസ്, ഡെപ്യൂട്ടി ജില്ലാ എഡ്യുക്കേഷന് മീഡീയ ഓഫീസര്മാരായ രജീന രാമകൃഷ്ണന്, രജിത പി.പി, കീഴക്കഞ്ചേരി കുടുംബാരോഗ്യ കേന്ദ്രം ഹെല്ത്ത് ഇന്സ്പെക്ടര് ഷാജി , പി.ആര്. ഒ അശ്വതി എന്നിവര് സംസാരിച്ചു.
ജില്ലയിലെ 14 ആരോഗ്യ ബ്ലോക്കുകള് കേന്ദ്രീകരിച്ചാണ് ഈ ബോധവല്ക്കരണ യാത്ര കടന്നുപോകുന്നത്. ഫെബ്രുവരി 13ന് ആരംഭിച്ച പര്യടനം മാര്ച്ച് മൂന്നിന് സമാപിക്കും. വിവിധ ബ്ലോക്കുകള്ക്ക് കീഴിലുള്ള കുടുംബാരോഗ്യ കേന്ദ്രങ്ങളിലും ജനകീയാരോഗ്യ കേന്ദ്രങ്ങളിലും ആരോഗ്യ വണ്ടി എത്തും.
