കുടുംബശ്രീ ദേശീയ സരസ് മേള ജനുവരി രണ്ടിന് മുഖ്യമന്ത്രി ഉദ്ഘാടനം നിർവഹിക്കും

കുടുംബശ്രീ മിഷൻ സംഘടിപ്പിക്കുന്ന ദേശീയ സരസ് മേള ജനുവരി രണ്ടിന് തൃത്താല ചാലിശ്ശേരി മുലയംപറമ്പ് മൈതാനത്ത് വെച്ച് മുഖ്യമന്ത്രി പിണറായി വിജയൻ ഉദ്ഘാടനം നിർവഹിക്കുമെന്ന് തദ്ദേശസ്വയംഭരണ എക്സൈസ് പാർലമെന്ററി കാര്യ വകുപ്പ് മന്ത്രി എം.ബി രാജേഷ് പത്രസമ്മേളനത്തിൽ അറിയിച്ചു. ഇന്ത്യയിലെ ഗ്രാമീണ സ്ത്രീ സംരംഭകരുടെ ഏറ്റവും വലിയ വ്യാപാരോത്സവമാണ് സരസ് മേള. കുടുംബശ്രീയുടെ നേതൃത്വത്തിൽ വർഷത്തിൽ രണ്ട് സരസ് മേളകളാണ് നടക്കുന്നത്. പതിമൂന്നാമത് സരസ് മേളക്ക് ഇത്തവണ തൃത്താല വേദിയാവുകയാണ്. കേരളം ഉൾപ്പെടെ 28 സംസ്ഥാനങ്ങളിൽ നിന്നും 8 കേന്ദ്രഭരണ പ്രദേശങ്ങളിൽ നിന്നുമുള്ള 250 പ്രദർശന വിപണന സ്റ്റാളുകളിൽ കരകൗശലവസ്തുക്കൾ, ആഭരണങ്ങൾ, തുണിത്തരങ്ങൾ, ഗൃഹോപകരണങ്ങൾ, നിത്യോപയോഗ സാധനങ്ങൾ തുടങ്ങി വിവിധ ഉത്പന്നങ്ങളുടെ പ്രദർശനവും വില്പനയും നടക്കുമെന്ന് മന്ത്രി കൂട്ടിച്ചേർത്തു. കേരളത്തിലേയും ഇതര സംസ്ഥാനങ്ങളിലെയും രുചിവൈവിധ്യം വിളമ്പുന്ന മുപ്പതിലധികം സ്റ്റാളുകൾ അടങ്ങുന്ന മെഗാ ഇന്ത്യൻ ഫുഡ്‌കോർട്ട്, പ്രശസ്‌തരായ കലാകാരന്മാരും കലാകാരികളും അണിനിരക്കുന്ന സംഗീത നൃത്തനിശകൾ, പ്രാദേശിക കലാകാരന്മാരുടേയും കലാകാരികളുടേയും, കുടുംബശ്രീ അംഗങ്ങളുടെയും വൈവിധ്യമാർന്ന കലാവിഷ്ക്കാരങ്ങൾ തൃത്താല മണ്ഡലത്തിലെ പ്രഗത്ഭ വ്യക്തിത്വങ്ങളെ ആദരിക്കുന്ന ആദരസന്ധ്യകൾ, വിവിധ വിഷയങ്ങളിൽ സെമിനാറുകൾ, പുഷ്‌പമേള, ഹാപ്പിനെസ് കോർണർ തുടങ്ങിയവയെല്ലാം മേളയിൽ ഉൾക്കൊള്ളിച്ചിട്ടുണ്ടെന്ന് അദ്ദേഹം പറഞ്ഞു.

ജനുവരി 2 വൈകീട്ട് 5:30 ന് നടക്കുന്ന ഉദ്ഘാടന സമ്മേളനത്തിൽ തദ്ദേശ സ്വയംഭരണ എക്സൈസ് പാർലമെൻ്ററി കാര്യ വകുപ്പ് മന്ത്രി എം.ബി രാജേഷ് അധ്യക്ഷനാവും. നിയമസഭാ സ്പീക്കർ എ.എൻ ഷംസീർ വിശിഷ്ട്ടാതിഥിയായെത്തും. വൈദ്യുതി വകുപ്പ് മന്ത്രി കെ കൃഷ്ണൻകുട്ടി, എം പി മാരായ അബ്‌ദുൾ സമദ് സമദാനി, വി.കെ ശ്രീകണ്ഠൻ എന്നിവർ ഉദ്ഘാടന സമ്മേളനത്തിൽ മുഖ്യാതിഥിയാവും. സമാപന സമ്മേളന ഉദ്ഘാടനം ജനുവരി 11 വൈകീട്ട് 6 മണിക്ക് ധനകാര്യ വകുപ്പ് മന്ത്രി കെ.എൻ ബാലഗോപാൽ നിർവഹിക്കും. കെ രാധാകൃഷ്ണൻ എം പി, പ്രശസ്ത സിനിമതാരം മഞ്ജു വാരിയർ എന്നിവർ മുഖ്യാതിഥികളായെത്തും. കൂടാതെ പൊതുമരാമത്ത് ടൂറിസം വകുപ്പ് മന്ത്രി പി.എ മുഹമ്മദ് റിയാസ്, റവന്യു വകുപ്പ് മന്ത്രി കെ രാജൻ, ഫിഷറീസ് സാംസ്കാരിക മന്ത്രി സജി ചെറിയാൻ, ഉന്നത വിദ്യാഭ്യാസ വകുപ്പ് മന്ത്രി ആർ ബിന്ദു, വ്യവസായ-കയർ-നിയമ വകുപ്പ് മന്ത്രി പി രാജീവ്, കൃഷി വകുപ്പ് മന്ത്രി പി പ്രസാദ്, കായിക ന്യൂനപക്ഷ ക്ഷേമ വകുപ്പ് മന്ത്രി അബ്ദുറഹിമാൻ എന്നിവർ വിവിധ ദിവസങ്ങളിലെ സാംസ്‌കാരിക സമ്മേളനങ്ങൾ ഉദ്ഘാടനം ചെയ്യും. തൃത്താല മണ്ഡലത്തിലെ 8 പഞ്ചായത്തുകളിലായി 33 ഏക്കറിൽ സരസ് മേള ഫുഡ് കോർട്ടിലേക്കാവശ്യമായ വിവിധയിനം പച്ചക്കറികൾ കുടുംബശ്രീ അംഗങ്ങളും സംഘകൃഷി ഗ്രൂപ്പുകളും കൃഷിചെയ്തു വരുന്നുണ്ട്. മേളയുടെ അടുത്ത ദിവസങ്ങളിൽ പച്ചക്കറികൾ വിളവെടുക്കും.

പ്രചരണത്തിൻ്റെ ഭാഗമായി ഡിസംബർ 20, 21, 22 തീയതികളിൽ ഗൃഹസന്ദർശനവും 28ന് തൃത്താല മണ്ഡലത്തിൽ ശുചീകരണ പ്രവർത്തനങ്ങൾ നടത്തും. 30 ന് കൂട്ടുപാത മുതൽ ചാലിശ്ശേരി വരെ മിനി മാരത്തോൺ സംഘടിപ്പിക്കും. 50 രൂപ വില വരുന്ന സമ്മാന കൂപ്പണും മേളയോടനുബന്ധിച്ച് ഏർപ്പെടുത്തിയിട്ടുണ്ട്. ഒന്നാം സമ്മാനം സ്വിഫ്റ്റ് കാർ, രണ്ടാം സമ്മാനമായി ബൈക്ക്, മൂന്നാം സമ്മാനമായി എൽ.ഇ.ഡി ടി.വി, നാലാം സമ്മാനമായി ഫ്രിഡ്ജ് എന്നിവ ലഭിക്കും. ഇതു കൂടാതെ സ്വർണ നാണയങ്ങൾ ഉൾപ്പെടെ നിരവധി പ്രോത്സാഹന സമ്മാനങ്ങളുമുണ്ട്. സരസ് മേളയുടെ സമാപനത്തോടനുബന്ധിച്ച് നറുക്കെടുപ്പ് നടക്കും.