നിറമരുതൂർ സ്കൂൾ ഹൈടെക് ഓഫീസും സ്റ്റാഫ് റൂമും ഉദ്ഘാടനം ചെയ്തു
മലപ്പുറം ജില്ലാ പഞ്ചായത്ത് വാർഷിക പദ്ധതിയിൽ 15 ലക്ഷം രൂപ വകയിരുത്തി നിർമ്മിച്ച നിറമരുതൂർ ഗവൺമെൻറ് ഹയർ സെക്കൻ്ററി സ്കൂളിലെ ഹയർ സെക്കൻ്ററി വിഭാഗം ഓഫീസും സ്റ്റാഫ് റൂമും ജില്ലാ പഞ്ചായത്ത് പ്രസിഡൻ്റ് എം.കെ. റഫീഖ ഉദ്ഘാടനം ചെയ്തു. ചടങ്ങിൽ ജില്ലാ പഞ്ചായത്ത് മെമ്പർ വി.കെ.എം. ഷാഫി അധ്യക്ഷത വഹിച്ചു.
താനൂർ ബ്ലോക്ക് പഞ്ചായത്ത് പ്രസിഡൻ്റ് കെ സൽമത്ത്, നിറമരുതൂർ ഗ്രാമപഞ്ചായത്ത് പ്രസിഡൻ്റ് ഇസ്മായിൽ പുതുശ്ശേരി, വൈസ് പ്രസിഡന്റ് സജിമോൾ കാവീട്ടിൽ, ജനപ്രതിനിധികളായ വി.ഇ.എം. ഇഖ്ബാൽ, പി.പി സൈതലവി, നാസർ പോളാട്ട്, ശാന്തമ്മ ടീച്ചർ തുടങ്ങിയവർ പങ്കെടുത്തു. കാലിക്കറ്റ് യൂണിവേഴ്സിറ്റി സെനറ്റ് മെമ്പറായി തെരഞ്ഞെടുക്കപ്പെട്ട ജില്ലാ പഞ്ചായത്ത് നിറമരുതൂർ ഡിവിഷൻ മെമ്പർ കൂടിയായ വി.കെ എം. ഷാഫിയെ ചടങ്ങിൽ വെച്ച് ആദരിച്ചു.
