പാലക്കാട് ജില്ലയിൽ ഏറ്റവും കൂടുതൽ വോട്ടർമാർ പട്ടാമ്പി മണ്ഡലത്തിൽ

പാലക്കാട് ജില്ലയിലെ 2026-ലെ നിയമസഭാ തിരഞ്ഞെടുപ്പിനുള്ള അന്തിമ വോട്ടർ പട്ടിക പ്രസിദ്ധീകരിച്ചപ്പോൾ, വോട്ടർമാരുടെ എണ്ണത്തിൽ ഏറ്റവും മുന്നിൽ നിൽക്കുന്നത് പട്ടാമ്പി മണ്ഡലമാണ്. ജില്ലാ കളക്ടർ മാധവിക്കുട്ടി എം.എസ്. പുറത്തുവിട്ട കണക്കുകൾ പ്രകാരം 2,10,000 വോട്ടർമാരാണ് പട്ടാമ്പി മണ്ഡലത്തിലുള്ളത്. പുരുഷ വോട്ടർമാരുടെ എണ്ണത്തിലും 1,04,047 പേരുമായി പട്ടാമ്പി തന്നെയാണ് ജില്ലയിൽ ഒന്നാമത് നിൽക്കുന്നത്. ജില്ലയിലെ ആകെ വോട്ടർമാരുടെ എണ്ണം 22,53,073 ആയി ഉയർന്നപ്പോൾ, ഏറ്റവും കുറവ് വോട്ടർമാരുള്ള മണ്ഡലമായി തരൂർ (1,63,524 പേർ) രേഖപ്പെടുത്തപ്പെട്ടു. കരട് പട്ടികയുമായി താരതമ്യം ചെയ്യുമ്പോൾ ജില്ലയിലാകെ 1,11,797 വോട്ടർമാരുടെ വർദ്ധനവാണ് ഇത്തവണ ഉണ്ടായിരിക്കുന്നത്.

മറ്റ് മണ്ഡലങ്ങളിലെ കണക്കുകൾ പരിശോധിക്കുമ്പോൾ ഒറ്റപ്പാലം (2,08,444), മണ്ണാർക്കാട് (2,05,816), തൃത്താല (2,02,694) എന്നീ മണ്ഡലങ്ങളാണ് വോട്ടർമാരുടെ എണ്ണത്തിൽ പട്ടാമ്പിക്ക് പിന്നാലെ വരുന്നത്. സ്ത്രീ വോട്ടർമാരുടെ എണ്ണത്തിൽ 1,07,272 പേരുമായി ഒറ്റപ്പാലം മണ്ഡലം മുന്നിട്ടുനിൽക്കുന്നു. ജില്ലയിലാകെ 11,05,398 പുരുഷന്മാരും 11,47,655 സ്ത്രീകളും 20 ഭിന്നലിംഗക്കാരുമാണ് വോട്ടർ പട്ടികയിലുള്ളത്. ഭിന്നലിംഗ വോട്ടർമാരുടെ എണ്ണത്തിൽ അഞ്ച് പേരുമായി മലമ്പുഴ മണ്ഡലമാണ് മുന്നിൽ. യുവ വോട്ടർമാരുടെ എണ്ണത്തിൽ ഉണ്ടായ വൻ വർദ്ധനവ് ശ്രദ്ധേയമാണ്; 18-19 പ്രായപരിധിയിലുള്ളവരുടെ എണ്ണം കരട് പട്ടികയിലെ 4,479-ൽ നിന്നും അന്തിമ പട്ടികയിൽ 34,281 ആയി ഉയർന്നു. വിദേശ ഇന്ത്യൻ വോട്ടർമാരുടെ എണ്ണത്തിലും 8,300 പേരുടെ വർദ്ധനവ് രേഖപ്പെടുത്തിയിട്ടുണ്ട്.

പ്രത്യേക ദുർബല ഗോത്രവർഗ്ഗക്കാരായ കുറുമ്പ, കാട്ടുനായ്ക്കർ, കാടർ വിഭാഗങ്ങളിൽപ്പെട്ട അർഹരായ മുഴുവൻ പേരെയും ഇത്തവണ പട്ടികയിൽ ഉൾപ്പെടുത്തിയിട്ടുണ്ടെന്ന് ജില്ലാ കളക്ടർ അറിയിച്ചു. അന്തിമ പട്ടിക പ്രസിദ്ധീകരിച്ചുവെങ്കിലും വോട്ടർ പട്ടികയിൽ പേര് ചേർക്കാനുള്ള അവസരം ഇനിയും ലഭ്യമാണ്. തിരഞ്ഞെടുപ്പ് കമ്മീഷൻ നിശ്ചയിച്ചിട്ടുള്ള അവസാന തീയതി വരെ പുതിയ അപേക്ഷകൾ സമർപ്പിക്കാവുന്നതും വോട്ടർ പട്ടികയിൽ തിരുത്തലുകൾ വരുത്താവുന്നതുമാണ്. വരാനിരിക്കുന്ന നിയമസഭാ തിരഞ്ഞെടുപ്പിന് ഈ അന്തിമ പട്ടികയും ഇനി പ്രസിദ്ധീകരിക്കാനിരിക്കുന്ന സപ്ലിമെന്ററി പട്ടികയും ചേർത്തായിരിക്കും ഉപയോഗിക്കുകയെന്നും രാഷ്ട്രീയ പാർട്ടി പ്രതിനിധികളുടെ യോഗത്തിൽ കളക്ടർ വ്യക്തമാക്കി.